Frederiek Nolf 21 urteko flandriar txirrindularia hilik azaldu da gaur goizean hoteleko gelan. Qatarko Itzulian ari zen parte hartzen, Flandriako Topsport Vlaanderen taldearekin.
Ekipoko batekin zegoen gelan eta, goizean Nolf esnatzen ez zela-eta, hark Jean Pierre Heynderrickx zuzendariari eta mediku bati deitu die. Honek egiaztatu du Nolf hilda zegoela. Oraindik ez dute esan zerk eraginda hil den.
Gaur korritu behar zuten itzuliko bosgarren etapa, baina bertan beheiti laga egin dute. Topsport Vlaanderenek utzi egin du proba.
Profesionaletan bigarren urtea zuen Nolfek. Otsailaren 10ean 22 urte betetzekoa zen. Kortrijk (frantsesez, Courtrai) hirian jaioa zen, Flandriako iparraldean.
Alavesek denboraldiko hirugarren entrenatzailea du gaurtik: Javier Lopez (44 urte, Bartzelona). Gaur bertan aurkeztu du, Gasteizen, atzo gauean Manix Mandiola kargutik kendu ondoren. Sei partidu zuzendu dizkio Mandiolak Alavesi, eta taldea Espainiako Bigarren A Mailako jaitsiera postuetan dago, 19. tokian, 24 punturekin.
Honda, Salamanca, Murtzia Hiria eta Nastic Tarragona entrenatu izan ditu Lopezek.
Mandiolak gaur eguerdian Euskadi Irratian azaldu du ez duela ezustean hartu zuzendaritzaren erabakiak. “Konfiantzarik ez zuten gurekin, eta inguruko ezerekin ere ez dute. Erraztasun gutxi dago hor. Itsasoan norabiderik gabe dagoen ontzia da Alaves”.
Mustafa Shakur (24 urte, Ameriketako Estatu Batuak) joko antolatzaileak Tau Baskonia utzi du gaur, eta Panellinios (Grezia) taldearekin fitxatu du.
Gasteizko klubak udaran ekarri zuen, Pablo Prigioni titularraren ordezkoa izateko, baina ez du maila onik eman. Tauk duela hilabete Vlado Ilievski basea fitxatu zuen. Honek dagoeneko jokatu ahal izango du Euroligan Taurekin, eta horregatik eten dute orain kontratua Shakurrek eta klubak.
Italiako Olinpiar Batzordeko dopajearen kontrako auzitegiak bi urteko zigorra jarri dio Leonardo Piepoli txirrindulariari, iazko Frantziako Tourrean bi aldiz epoagatik positibo eman zuela egotzita. Piepoli ez da auzitegian gaurko saioan izan.
2011ko urtarrilaren 25era ezingo du korritu. 37 urte dauzka.
Joan den urteko uztailaren 4ko eta 15eko kontroletan eman zuen positibo. Riccardo Ricco Saunier Duval taldeko kideak ere eman zuen Tourrean positibo, eta taldeak proba utzi egin zuen.
